30
وهدے راهیلا دیست که من په آکوبا هچّ چُکّ نئیاورتگ، وتی گهارئے سرا هَسَدّیگ بوت.
گڑا گۆن آکوبا گوَشتی:
”منا چُکّ و ائولاد بدئے، اگن نه منَ مِران.“
2 آکوب آییئے سرا زهر گِپت و گوَشتی:
”زانا من هُدا آن که تئیی دێمُن داشتگ که چُکّ مئیارئے؟“
3 راهیلا گوَشت:
”اِش اِنت منی مۆلد بِلَّه.
گۆن اِشیا وپت و واب بکن که په من چُکّ بیاریت و آییئے برکتا منا هم ائولاد ببیت.“
4 گڑا راهیلا وتی مۆلد بِلَّه په جَنی آکوبارا دات و آکوبا گۆن آییا وپت و واب کرت.
5 بِلَّه لاپپُرّ بوت و په آکوبا مردێنچُکّے آورتی.
6 گڑا راهیلا گوَشت:
”هُدایا منی دادرَسی* کرتگ.
منی پریاتی گۆش داشتگ و منا چُکّے داتگی.“
پمێشکا آییئے نامی دان* کرت.
7 راهیلئے مۆلد بِلَّه پدا لاپپُرّ بوت و په آکوبا دگه مردێنچُکّے آورتی.
8 گڑا راهیلا گوَشت:
”منا گۆن وتی گهارا مزنێن جنگ و جێڑهے بوتگ و من کَٹِّتگ.“
پمێشکا اے چُکّئے نامی نَپتالی* کرت.
9 بله وهدے لیاها دیست که من چُکّ آورتَ نکنان، وتی مۆلد زِلپَهی چست کرت و په جَنی آکوبارا دات.
10 گڑا لیاهئے مۆلد زِلپَها په آکوبا مردێنچُکّے آورت و
11 لیاها گوَشت:
”چۆنێن وشّێن بَهتے!“
پمێشکا اے چُکّئے نامی جاد* کرت.
12 لیاهئے مۆلد زِلپَها په آکوبا دگه مردێنچُکّے آورت.
13 گڑا لیاها گوَشت:
”من سکّ گَل آن.
جنێنان منی نام کرتگ ’گَلاتون‘.“
پمێشکا چُکّئے نامی آشِر* کرت.
14 گَلّهئے رۆن و مۆشئے وهدا روبِن شت و ڈگارێا لهتێن مِهرکاهی* در گێتک و په وتی مات لیاها آورت.
گڑا راهیلا گۆن لیاها گوَشت:
”چه وتی چُکّئے مِهرکاهان منا کمّے بدئے.“
15 بله لیاها گوَشت:
”تئو منی مرد برتگ، بَسّ نهاِنت؟
نون منی چُکّئے مِهرکاهان هم پَچَ گِرئے؟“
راهیلا گوَشت:
”شَرّ اِنت، تئیی چُکّئے مِهرکاهانی مُزّا، اِنشپی آکوب گۆن تئو بوپسیت.“
16 گڑا وهدے آکوب بێگاهئے وهدا چه ڈگارا پِر تَرّت، لیاه ڈنّا آییئے دێما در آتک و گۆن آییا گوَشتی:
”گۆن من بوَپس که من وتی چُکّئے مِهرکاهانی بدلا ترا کرێه کرتگ.“
گڑا آ شپا آکوبا گۆن لیاها وپت و واب کرت.
17 هُدایا لیاهئے پریات گۆش داشت و لیاه لاپپُرّ بوت و پنچمی رندا په آکوبا مردێنچُکّے آورتی.
18 گڑا لیاها گوَشت:
”من وتی مۆلد وتی مَردارا دات و هُدایا منی مُزّ دات.“
گڑا اے چُکّئے نامی ایسّاکار* کرت.
19 لیاه پدا لاپپُرّ بوت و شَشُمی رندا په آکوبا مردێنچُکّے آورتی.
20 گڑا لیاها گوَشت:
”هُدایا منا کیمَّتیێن سئوگاتے بَکشاتگ.
نون منی مرد منی اِزَّتا کنت که من په آییا شَش مردێنچُکّ آورتگ.“
گڑا چُکّئے نامی زِبولون* کرت.
21 مُدّتێا رند لیاها جنێنچُکّے آورت و آییئے نامی دینَه کرت.
22 نون هُدا راهیلئے ترانَگا کپت، آییئے نێمگا دلگۆشی گوَر کرت و چُکّے بَکشاتی.
23 راهیل لاپپُرّ بوت و مردێنچُکّے آورتی.
گوَشتی:
”هُدایا منی کَمشَرپی دور کرتگ.“
24 پمێشکا چُکّئے نامی ایسُّپ* کرت.
گوَشتی:
”هُداوند منا دگه مردێنچُکّے هم بدئیات.“
آکوب مالدارَ بیت
25 وهدے راهیلا ایسُّپ آورت، آکوبا گۆن لابانا گوَشت:
”نون منا رَزا بدئے که وتی جندئے ڈێها واتَرَّ کنان.
26 په اے جَن و چُکّانیگی که تئیی هِزمتُن کرتگ، اِشان منا بدئے که زورانِش و رئوان.
تئو وتَ زانئے که من په تئو چینچُک کار کرتگ.“
27 لابانا گوَشت:
”منا اِزّت بدئے.
دَزبندیَ کنان همِدا بدار.
من پال* جتَگ و منا اے سَرپدی رَستگ که هُداوندا په تئییگی منا برکت داتگ.“
28 پدا گوَشتی:
”وتی مُزّا بگوَش، ترا دئیانی.“
29 آکوبا گوَشت:
”تئو زانئے که من چِه پئیما په تئو کار کرتگ و تئیی مال و دَلوَت من چۆن شَرّ داشتگاَنت.
30 چه منی آیگا پێسر ترا کَمُّک هستاَت و نون سکّ باز بوتگاَنت.
هر جاه که من وتی پاد اێر کرتگ، هُداوندا ترا همۆدا برکت داتگ.
بله من کدی په وتی جندئے لۆگا کارے بکنان؟“
31 لابانا جُست کرت:
”ترا چے بدئیان؟“
آکوبا پَسّئو تَرّێنت:
”منا هچّ مدئے، بله اگن اے یکّێن کارا په من بکنئے، گڑا من اَنگت تئیی رمگئے شپانکی و پاسپانیا کنان.
32 بِلّ مرۆچی تئیی سرجمێن رمگانی نیاما گردان.
سجّهێن ٹِکّ ٹِکّێن اِسپێتپَس و سیاهێن گوَرانڈ و سجّهێن ٹِکّ ٹِکّێن سیَهپَسان جِتا کنان.
اے منی مُزَّ بنت.
33 باندا رۆچ اگن همے مُزّا بچارئے که تئو منا داتگ، منی راستی و تچکی وت په من گواهیَ دنت.
اگن تئو منی کِرّا اَنچێن سْیَهپَسے در گێتک که ٹِکّ ٹِکّ مبیت یا اَنچێن گوَرانڈے که رنگی سیاه مبیت، بزان آ دُزِّتگێن مالے.“
34 لابانا گوَشت:
”شَرّ اِنت.
اَنچُشَ کنێن.“
35 آ رۆچی لابانا سجّهێن ٹِکّ و ٹَگارێن پاچِن، سرجمێن ٹِکّ ٹِکّێن بُز که اِسپێتێن نِشانِش پِر اَت و سجّهێن سیاهێن گوَرانڈ جتا کرت و وتی مردێنچُکّانی دستا دات و
36 چه آکوبا سئے رۆچئے راها دور برتنت.
اے وهدا آکوب، لابانئے آ دگه پَسان چارێنگا اَت.
37 بله آکوبا اِسپێدار، بادام و چِنالانی نۆک بُرِّتگێن شاهڑ زُرت و پۆست پاتک و شاهڑانی تهئے اِسپێتی دَرا کرتنت که اسپێتێن تَل زاهر ببنت.
38 پدا پاتکَگێن شاهَڑی زُرت و آپدانئے تها اێر کرتنت که دَلوَت که آپا کایَنت، شاهَڑِش دێما ببنت.
وَهْرئے* وهدا، دَلوَت که آپا آتکنت،
39 شاهَڑانی دێما جُپتَ بوتنت.
پمێشکا ٹِکّ و ٹَگارێن چُکِّشَ آورت.
40 آکوبا کَسانێن گوَرگ جتا کرتنت و اے دگرانی دێمی گۆن ٹَگارێن پَس و سیاهێن پَسان کرت که لابانئیگ اَتنت.
اے پئیما وتی دَلوَتی جتا کرتنت و گۆن لابانئے دَلوَتان هۆری نکرتنت.
41 هر وهدا که زرِنگێن مادگێن دَلوَت وَهْرَ بوتنت، آکوبا شاهَڑ آیانی دێمئے آپدانانی تها اێرَ کرتنت که دَلوَت اے شاهَڑانی کِرّا جُپت ببنت.
42 بله هما پَس که نِزۆر اَتنت، شاهَڑی آیانی دێما اێرَ نکرتنت.
اے پئیما نِزۆرێن پَس لابانئے نێمگا شتنت و زرِنگێن آکوبئے نێمگا.
43 اے ڈئولا آکوب سکّ سێر و آباد بوت و بلاهێن رمگانی واهُند بوت.
گُلام و مۆلِد و اُشتر و هَری هم باز بوت.